ÁNDALE, Bon appêtit! é unha comedia en clave de clown onde tres cociñeiros mexicanos Antonio, Francisco e Felipe tentarán amosar os segredos da cociña mexicana baseados nas receitas da cociñeira Abigail Mendoza, quen dedicou a súa vida a recuperar, conservar e difundir as súas raíces culturais e gastronómicas milenarias dende a cociña.

A súa cociña está declarada pola UNESCO patrimonio oral e inmaterial da humanidade. Cunha posta en escena colorista, uns personaxes grotescos e un ambiente evocador, Ghazafelhos quere enganchar ao público dende o primeiro momento facéndoo partícipe das desventuras, malos entendidos e solucións para cada prato.

Para elo, mestúrase teatro físico, música, títeres e un texto de enredo con moito xogo de palabras.