Ninja

‘Ninja’ é unha obra da compañía Teatro Ghazafelhos dirixida ao público familiar a partir de 5 anos que aborda a problemática do acoso escolar a través dunha historia que reflexiona sobre o respecto, o apoio mutuo e a diversidade. Tori, a súa protagonista, quere ser ninja e adestra todos os días para pasar inadvertida. Neste proceso, descobre que no seu colexio hai moitas nenas e nenos que queren ser invisibles para deixar de sufrir acoso nas aulas. Coa axuda do seu veciño, o señor Edelmiro, buscarán a forma de dar visibilidade ao que está a acontecer e conseguir mudar a situación.

En ‘Ninja’, Teatro Ghazafelhos xoga coa simbloxía da cultura oriental e das expresións artísticas de diferentes momentos históricos para falar da necesidade de coidar a vida, traballar en equipo e compartir os malestares. O elenco da peza está formado por Montse Piñón, Jorge Casas e Pepablo Patiño e o dúo BellónMaceiras (Dani Bellón e Diego Maceiras) foron os encargados de compoñer pezas de música tradicional con sonoridade oriental.